പ്രമേഹ രോഗികൾ പാവയ്ക്ക ജ്യൂസ് കുടിക്കേണ്ടത് എപ്പോൾ

ശരീരത്തിലെ ഒട്ടുമിക്ക അവയവങ്ങളുടെ പ്രവർത്തനങ്ങളെ ബാധിക്കുന്ന ഗുരുതരമായ രോഗാവസ്ഥയാണ് പ്രമേഹം. ലോകത്തുടനീളം 830 മില്ല്യൺ ആളുകൾ പ്രമേഹത്തിന്‍റെ പിടിയിലാണെന്ന് ലോകാരോഗ്യ സംഘടനയുടെ കണക്കുകകൾ സൂചിപ്പിക്കുന്നു. ഇന്‍റർനാഷണൽ ഡയബെറ്റിസ് ഫെഡറേഷന്‍റെ കണക്കുകൾ അനുസരിച്ച് കഴിഞ്ഞ വർഷം മാത്രം 3.4 മില്ല്യൺ പേർക്കാണ് പ്രമേഹം മൂലം ജീവൻ നഷ്‌ടമായത്. മോശം ജീവിതശൈലി, അനാരോഗ്യകരമായ ഭക്ഷണക്രമം, വ്യായാമത്തിന്‍റെ അഭാവം എന്നിവയെല്ലാം പ്രമേഹത്തിന്‍റെ പ്രധാന കാരണങ്ങളാണ്.

ജീവിതശൈലിയെ മാറ്റങ്ങൾ ചെറുപ്പക്കാർക്കിടയിലും പ്രമേഹം വർധിക്കാൻ ഇടയാകുന്നു. എന്നാൽ ആരോഗ്യകരമായ ഭക്ഷണക്രമം പിന്തുടരുന്നതിലൂടെ ഒരു പരിധിവരെ പ്രമേഹത്തെ തടയാൻ സാധിക്കും. പ്രമേഹത്തെ വരുതിയിലാക്കാൻ ഡയറ്റിൽ രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കുന്ന ഭക്ഷണങ്ങൾ ഉൾപ്പെടുത്തേണ്ടത് അത്യന്തപേക്ഷിതമാണ്. അത്തരത്തിൽ ഒന്നാണ് പാവയ്ക്ക അഥവാ കയ്പ്പക്ക. പ്രമേഹ രോഗികളിൽ പലരും രക്തത്തിലെ പഞ്ചസാരയുടെ അളവ് നിയന്ത്രിക്കാനായി പാവയ്ക്ക ജ്യൂസ് കുടിക്കുന്നവരാണ്. എന്നാൽ പൂർണ ഗുണങ്ങൾ ലഭിക്കാൻ എപ്പോഴാണ് പാവയ്ക്ക ജ്യൂസ് കുടിക്കേണ്ടതെന്ന് പലർക്കും അറിയില്ലെന്നതാണ് സത്യം. പ്രമേഹത്തെ നേരിടാൻ പാവയ്ക്ക ജ്യൂസ് കുടിക്കേണ്ട ശരിയായ സമയം എപ്പോഴെന്നും ഗുണങ്ങളെ കുറിച്ചും അറിയാം.

പാവയ്ക്ക ജ്യൂസിന്‍റെ ഗുണങ്ങൾ
പ്രമേഹം നിയന്ത്രിക്കാൻ വളരെയധികം സഹായിക്കുന്ന ഒന്നാണ് പാവയ്ക്ക. രക്തത്തിലെ പഞ്ചസാരയുടെ അളവ് കുറയ്ക്കുന്നതിനും ഇൻസുലിൻ സംവേദനക്ഷമത മെച്ചപ്പെടുത്തുന്നതിനും ഇത് ഗുണം ചെയ്യും. പൊട്ടാസ്യം, ഇരുമ്പ്, സിങ്ക്, ഫൈബർ, ഫോളേറ്റ്, വിറ്റാമിൻ സി, വിറ്റാമിൻ എ തുടങ്ങിയ പോഷകങ്ങൾ പാവയ്‌ക്കയിൽ ധാരാളം അടങ്ങിയിട്ടുണ്ട്. ഇത് മൊത്തത്തിലുള്ള ആരോഗ്യത്തെ പിന്തുണയ്ക്കും, പാവയ്ക്ക ജ്യൂസിലെ ചാരാന്‍റിൻ, പോളിപെപ്റ്റൈഡ്-പി എന്നീ സംയുക്തങ്ങൾ രക്തത്തിലെ ഗ്ലുക്കോസിന്‍റെ അളവ് കുറയ്ക്കാൻ സഹായിക്കുമെന്ന് ചില പഠനങ്ങൾ കണ്ടെത്തിയിട്ടുണ്ട്. ഇതിലെ ഫൈബർ കാർബോഹൈഡ്രേറ്റിന്‍റെ ദഹനം, ആകിരണം എന്നിവ മന്ദഗതിയിലാക്കാൻ സഹായിക്കും. മാത്രമല്ല രക്തത്തിലെ പഞ്ചസാരയുടെ അളവ് വർധിക്കുന്നത് തടയാനും ഫലപ്രദമാണിത്.

പ്രമേഹ രോഗികൾ പാവയ്ക്ക ജ്യൂസ് കുടിക്കേണ്ടത് എപ്പോൾ
പതിവായി പാവയ്ക്ക ജ്യൂസ് കുടിക്കുന്നത് രക്തത്തിലെ പഞ്ചസാരയുടെ അളവ് കുറയ്ക്കാനും മെറ്റബോളിസം വർദ്ധിപ്പിക്കാനും സഹായിക്കും. പാവയ്ക്ക ജ്യൂസിന്‍റെ ഗുണങ്ങൾ ഫലപ്രദമായി ലഭിക്കാൻ രാവിലെ വെറും വയറ്റിൽ വേണം കുടിക്കാൻ. പാവയ്ക്കയിലെ പോഷകങ്ങൾ ശരിയായി ആഗിരണം ചെയ്യാൻ സഹായിക്കും. ദഹനം മെച്ചപ്പെടുത്താനും ദിവസം മുഴുവൻ ഊർജ്ജത്തോടെ നിലനിർത്താനും ഇത് ഫലം ചെയ്യും.

പാവയ്ക്ക ജ്യൂസിന്‍റെ മറ്റ് ഗുണങ്ങൾ

ശരീരഭാരം കുറയ്ക്കാൻ
പാവയ്‌ക്കയിൽ കുറഞ്ഞ അളവിൽ മാത്രമേ കലോറി അടങ്ങിയിട്ടുള്ളൂ. വിശപ്പ് നിയന്ത്രിക്കാനും കൊഴുപ്പ് രാസവിനിമയത്തെ പ്രോത്സാഹിപ്പിക്കാനുമുള്ള കഴിവ് പാവയ്ക്കക്കുണ്ട്. കൊഴുപ്പ് കുറയ്ക്കാനും ഇത് സഹായിക്കും. ഇവയെല്ലാം ശരീരഭാരം കുറയ്ക്കാൻ ഗുണം ചെയ്യും.

പ്രതിരോധശക്തി വർധിപ്പിക്കും
ആന്‍റി ഓക്‌സിഡന്‍റുകളുടെ സമ്പന്ന ഉറവിടമാണ് പാവയ്ക്ക. ഇത് രോഗപ്രതിരോധ സംവിധാനത്തെ ശക്തിപ്പെടുത്താനും അണുബാധകളെ ചെറുക്കാനും സഹായിക്കും. കാൻസർ കോശങ്ങളെ വളർച്ച മന്ദഗതിയിലാക്കാനും ഇത് ഫലം ചെയ്യും.

ചർമ്മത്തിന്‍റെ ആരോഗ്യം
പാവയ്‌ക്കയിൽ ചർമ്മത്തിന്‍റെ ആരോഗ്യത്തെ പിന്തുണയ്ക്കുന്ന വിറ്റാമിനുകളും ധാതുക്കളും ഉയർന്ന അളവിൽ അടങ്ങിയിട്ടുണ്ട്. ഇത് മുഖക്കുരു അകറ്റാനും ചർമ്മത്തിന്‍റെ നിറം മങ്ങൽ കുറയ്ക്കാനും സ്വാഭാവിക തിളക്കം വർധിപ്പിക്കാനും സഹായിക്കും. ചർമ്മത്തിന്‍റെ മൊത്തത്തിലുള്ള ആരോഗ്യം മെച്ചപ്പെടുത്താനും ഫലപ്രദമാണിത്.

കരളിന്‍റെ ആരോഗ്യം
വിഷവിമുക്തമാക്കൽ ഗുണങ്ങൾക്ക് പേരുകേട്ടതാണ് പാവയ്ക്ക ജ്യൂസ്. കരളിലെ വിഷാംശം നീക്കം ചെയ്യാനും കരൾ എൻസൈമുകൾ നിയന്ത്രിക്കാനും ഇത് ഗുണം ചെയ്യും. കരളിന്‍റെ മൊത്തത്തിലുള്ള പ്രവത്തനത്തെയും ഇത് പിന്തുണയ്ക്കും.

ദഹനം മെച്ചപ്പെടുത്തും
നാരുകളുടെ സമ്പുഷ്‌ട ഉറവിടമാണ് പാവയ്ക്ക. ദഹനം മെച്ചപ്പെടുത്താൻ ഇത് സഹായിക്കും. പാവയ്ക്ക ജ്യൂസ് കുടിക്കുന്നത് ദഹനക്കേട്, ഗ്യാസ് തടുങ്ങിയ ദഹന പ്രശ്‌നങ്ങൾ പരിഹരിക്കാൻ ഗുണകരമാണ്. മലബന്ധം ലഘൂകരിക്കാനും ഫലപ്രദമാണിത്.

ശ്വസനാരോഗ്യം
ആന്‍റി ഇൻഫ്ലമേറ്ററി, ആന്‍റി വൈറൽ, ആന്‍റി ഹിസ്റ്റമൈൻ എന്നീ ഗുണങ്ങൾ പാവയ്‌ക്കയിൽ അടങ്ങിയിട്ടുണ്ട്. ആസ്ത്മ, ജലദോഷം, വൈറൽ അണുബാധകൾ, തുടങ്ങിയ ശ്വസന പ്രശ്‌നങ്ങൾ ലഘൂകരിക്കാൻ ഇത് സഹായിക്കും.

എന്നിരുന്നാലും, ഏതെങ്കിലും രോഗം ഭേദമാക്കാൻ പാവയ്ക്ക കഴിക്കാൻ നിങ്ങൾ ആഗ്രഹിക്കുന്നുവെങ്കിൽ, ആദ്യം നിങ്ങളുടെ ഡോക്ടറെ സമീപിക്കുക. വിദഗ്ദ്ധോപദേശം കൂടാതെ അത്തരം വ്യവസ്ഥകൾ സ്വയം സ്വീകരിക്കുന്നത് നേട്ടത്തിനു പകരം നഷ്ടത്തിനുള്ള സാധ്യത വർദ്ധിപ്പിക്കും.

അതേസമയം പാവയ്ക്ക ജ്യൂസ് കുടിക്കുന്നതിന് മുമ്പ് ഒരു ആരോഗ്യ വിദഗ്ദ്ധനെ സമീപിക്കേണ്ടത് അത്യാവശ്യമാണ്. പ്രത്യേകിച്ച് നിങ്ങൾ പ്രമേഹ മരുന്നുകൾ കഴിക്കുന്ന ആളാണെങ്കിൽ. രക്തത്തിലെ പഞ്ചസാരയുടെ അളവ് വളരെയധികം കുറയാൻ പാവയ്ക്ക കാരണമാകും. രക്തത്തിലെ ഗ്ലൂക്കോസിന്‍റെ അളവിൽ അമിതമായ ഏറ്റക്കുറച്ചിലുകൾ ഉണ്ടാക്കുന്നില്ലെന്ന് ഉറപ്പാക്കാൻ പതിവായി നിരീക്ഷിക്കുക.