ലണ്ടൻ : വടക്കുപടിഞ്ഞാറൻ ഇംഗ്ലണ്ടിൽ ബുധനാഴ്ച രാത്രി റിക്ടർ സ്കെയിലിൽ 3.3 തീവ്രത രേഖപ്പെടുത്തിയ ഭൂചലനം അനുഭവപ്പെട്ടു. ലങ്കാഷെയറിലെ സിൽവർഡെയ്ൽ തീരത്തിന് സമീപം 3 കിലോമീറ്റർ (1.86 മൈൽ) ആഴത്തിലാണ് പ്രഭവകേന്ദ്രം എന്ന് ബ്രിട്ടീഷ് ജിയോളജിക്കൽ സർവേ (BGS) സ്ഥിരീകരിച്ചു. രാത്രി 11.23-ഓടെ ഉണ്ടായ ഈ ഭൂചലനത്തിന്റെ പ്രകമ്പനം കിലോമീറ്ററുകളോളം ദൂരത്തിൽ അനുഭവപ്പെട്ടു.
ലങ്കാഷെയറിന് പുറമെ അയൽപ്രദേശമായ കുംബ്രിയയിലും ശക്തമായ കുലുക്കം അനുഭവപ്പെട്ടു. വീടുകൾ കുലുങ്ങിയതായും ഭൂമിക്കടിയിൽ വലിയൊരു സ്ഫോടനം നടന്നതുപോലെ ശബ്ദം കേട്ടതായും പ്രദേശവാസികൾ സോഷ്യൽ മീഡിയയിൽ കുറിച്ചു.
യുകെയിൽ ഓരോ വർഷവും 200 മുതൽ 300 വരെ ചെറിയ ഭൂചലനങ്ങൾ ബിജിഎസ് കണ്ടെത്തുന്നുണ്ടെങ്കിലും, ഏകദേശം 20-30 എണ്ണം മാത്രമാണ് ആളുകൾക്ക് അനുഭവപ്പെടാറുള്ളത്. ഒക്ടോബർ 20-ന് പെർത്തിലും കിൻറോസിലും 3.3 തീവ്രത രേഖപ്പെടുത്തിയ ഭൂചലനത്തിന് ശേഷം യുകെയിൽ റിപ്പോർട്ട് ചെയ്യപ്പെടുന്ന, ജനങ്ങൾക്ക് അനുഭവപ്പെട്ട പ്രധാന ഭൂചലനമാണിത്.
Be the first to comment