മാഞ്ചസ്റ്റർ,ലണ്ടൻ : കുട്ടികളോട് ലൈംഗിക ചുവയോടെ ഓൺലൈനിൽ ചാറ്റ് നടത്തിയ സംഭവത്തിൽ യുകെയിൽ മലയാളി യുവാവ് അറസ്റ്റിൽ. കോട്ടയം കുറുവിലങ്ങാട് സ്വദേശി ജിതിൻ ജോസ് ആണ് അറസ്റ്റിലായത്.
ആൽവിൻ ഏബ്രഹാം എന്ന പേരിലാണ് ജിതിൻ കുട്ടികളെ പീഡിപ്പിക്കണമെന്ന ആഗ്രഹത്തോടെ ലൈംഗിക ചുവയിൽ ചാറ്റ് നടത്തിയത്. മാഞ്ചസ്റ്ററിന് സമീപം സ്റ്റോക്പോര്‍ട്ടില്‍ നിന്നും ഹള്ളിന് സമീപമുള്ള ഗ്രിപ്‌സിയില്‍ എത്തിയതോടെയാണ്‌ ചൈൽഡ് ഓൺലൈൻ സപ്പോർട്ട് ടീം ജിതിനെ അറസ്റ്റ് ചെയ്തത്. അറസ്റ്റിനെ തുടർന്ന് ജിതിനെ ചോദ്യം ചെയ്യുന്നതും കുറ്റ സമ്മതം നടത്തുന്നതുമായ വിഡിയോ ചൈൽഡ് ഓൺലൈൻ സേഫ്റ്റി ടീം സമൂഹ മാധ്യമങ്ങളിൽ പങ്കുവച്ചിട്ടുണ്ട്.
കെയർ അസിസ്റ്റന്റ് ആയി ജോലി ചെയ്യുന്ന ജിതിൻ മൂന്ന് വർഷം മുൻപ് ആണ് യുകെയിൽ എത്തുന്നത്. സ്റ്റോക്പോർട്ടിൽ എത്തിയ കാലം മുതല്‍ പള്ളിയുമായി ഏറെ ബന്ധപെട്ടു പ്രവര്‍ത്തിച്ച ജിതിൻ ദേവാലയ ശുശ്രൂഷകനും മതപഠന ക്ലാസുകൾ എടുത്തിരുന്ന ആളുമാണെന്ന വിവരങ്ങൾ പുറത്തു വരുന്നുണ്ട്.
ഇപ്പോൾ റിമാൻഡിൽ കഴിയുന്ന ജിതിന് കോടതിയില്‍ വിചാരണ പൂർത്തിയാകുന്നതോടെ ഒരു വർഷത്തിലധികം ശിക്ഷ ലഭിക്കുമെന്നാണ് പുറത്തു വരുന്ന സൂചന. ശിക്ഷ ലഭിച്ചാൽ ഇപ്പോഴത്തെ യുകെ നയം അനുസരിച്ച് നാട് കടത്തൽ ഉൾപ്പടെയുള്ള നടപടികളും ഉണ്ടായേക്കും.
Be the first to comment