തിരുവനന്തപുരം മെഡിക്കല്‍ കോളേജ് ഡയാലിസിസ് ഡിപ്പാര്‍ട്ട്‌മെന്റില്‍ വിദ്യാര്‍ത്ഥികള്‍ക്ക് അതിക്രമം നേരിട്ട സംഭവത്തില്‍ നടപടി. മെഡിക്കല്‍ കോളേജ് പ്രിന്‍സിപ്പല്‍ സുരക്ഷ വര്‍ധിപ്പിക്കാന്‍ നിര്‍ദ്ദേശം നല്‍കി. കഴിഞ്ഞ ദിവസമാണ് നൈറ്റ് ഡ്യൂട്ടിക്കിടയില്‍ വിദ്യാര്‍ത്ഥികള്‍ക്ക് അപരിചിതന്റെ ആക്രമണം നേരിടേണ്ടിവന്നത്.
നാലാം വര്‍ഷ ഡയാലിസിസ് ടെക്‌നോളജി വിദ്യാര്‍ഥികള്‍ക്കാണ് മെഡിക്കല്‍ കോളേജില്‍ കഴിഞ്ഞദിവസം ദുരനുഭവം ഉണ്ടായത്. അപരിചിതനായ വ്യക്തി വിദ്യാര്‍ത്ഥികള്‍ വിശ്രമിച്ചിരുന്ന മുറിയില്‍ അതിക്രമിച്ച് കയറി, കാലില്‍ കയറി പിടിച്ചു. കത്രികയും കസേരയും കൊണ്ട് ഡയാലിസിസ് ഡിപ്പാര്‍ട്ട്‌മെന്റില്‍ പരിഭ്രാന്തി പരത്തി. തുടര്‍ന്നാണ് മെഡിക്കല്‍ കോളേജ് പ്രിന്‍സിപ്പലിന് വിദ്യാര്‍ഥികള്‍ പരാതി നല്‍കിയത്.
വിശ്രമ മുറിയില്‍ അതിക്രമിച്ചു കയറിയത് തൊട്ടപ്പുറത്തുള്ള സൈക്കാട്രിക്ക് ഡിപ്പാര്‍ട്ട്‌മെന്റിലെ രോഗി എന്നാണ് മെഡിക്കല്‍ കോളേജ് പ്രിന്‍സിപ്പല്‍ നല്‍കുന്ന വിശദീകരണം. എങ്ങനെ രോഗി ഡയാലിസിസ് ഡിപ്പാര്‍ട്ട്‌മെന്റ് എത്തി എന്നതില്‍ വ്യക്തതയില്ല. അടിയന്തര സാഹചര്യത്തില്‍ ആശുപത്രിയിലെ സെക്യൂരിറ്റി ജീവനക്കാര്‍ സഹായിച്ചില്ലെന്ന പരാതിയും വിദ്യാര്‍ഥികള്‍ ഉന്നയിച്ചിരുന്നു. പരാതി പരിഗണിച്ച് അടിയന്തര നടപടിയെടുക്കുമെന്നും കൂടുതല്‍ സുരക്ഷാ ജീവനക്കാരെ വിന്യസിക്കുമെന്നുമാണ് മെഡിക്കല്‍ കോളേജ് അധികൃതരുടെ വിശദീകരണം.
Be the first to comment