ശബരിമല സ്വര്ണക്കൊള്ള കേസില് ദേവസ്വം ബോര്ഡ് മുന് പ്രസിഡന്റ് എ പത്മകുമാറിന്റെ ജാമ്യാപേക്ഷയില് എസ്ഐടിയുടെ റിപ്പോര്ട്ട് തേടി കൊല്ലം വിജിലന്സ് കോടതി. എസ്ഐടിയുടെ റിപ്പോര്ട്ട് ലഭിച്ച ശേഷം ജാമ്യപേക്ഷ ഡിസംബര് 8ന് പരിഗണിക്കും. ദേവസ്വം മുന് കമ്മീഷണര് എന് വാസുവിന്റെ ജാമ്യാപേക്ഷയില് നാളെ വിധി പറയും.
ദേവസ്വം ബോര്ഡ് തീരുമാനത്തിന് കൂട്ടുത്തരവാദിത്തമുണ്ടെന്നും താന് മാത്രം എങ്ങനെ പ്രതിയാകുമെന്നുമാണ് ജാമ്യാപേക്ഷയില് പത്മകുമാറിന്റെ ചോദ്യം. ബോര്ഡ് അംഗങ്ങളുടെ അറിവോടെയാണ് ചെമ്പ് എന്ന് രേഖപ്പെടുത്തിയത്. ഉദ്യോഗസ്ഥര് പിച്ചള എന്നെഴുതിയപ്പോള് താനാണ് ചെമ്പ് എന്ന് മാറ്റിയത്. പാളികള് ചെമ്പ് ഉപയോഗിച്ച് നിര്മിച്ചതുകൊണ്ടാണ് അങ്ങനെ തിരുത്തിയത് എന്നും എ. പത്മകുമാറിന്റെ ജാമ്യാപേക്ഷയില് പറയുന്നു. വീഴ്ചയുണ്ടെങ്കില് അംഗങ്ങള്ക്ക് പിന്നീടും ചൂണ്ടിക്കാണിക്കാമെന്നും സ്വര്ണക്കവര്ച്ചയില് പങ്കില്ലെന്നും ആണ് ജാമ്യാപേക്ഷയില് പത്മകുമാര് പറയുന്നത്.
ജാമ്യാപേക്ഷ പരിഗണിച്ച കോടതി എസ് ഐ ടി യു ടെ റിപ്പോര്ട്ട് തേടി.ഡിസംബര് 8 ന് കേസ് വീണ്ടും കോടതി പരിഗണിക്കും. അതേസമയം, ദേവസ്വം ബോര്ഡ് മുന് കമ്മീഷണര് എന് വാസുവിന്റെ ജാമ്യാപേക്ഷയില് കൊല്ലം വിജിലന്സ് കോടതി നാളെ വിധി പറയും.
Be the first to comment