ലണ്ടൻ: യുകെയിൽ അതിശക്തമായ ആർട്ടിക് ശീതക്കാറ്റ് എത്തിയതോടെ മഞ്ഞുവീഴ്ചക്ക് സാധ്യതയെന്ന് മെറ്റ് ഓഫിസ് അറിയിച്ചു. താപനില സാധാരണയേക്കാൾ 3C മുതൽ 6C വരെ കുറയും. സ്കോട്ട്ലൻഡ്, വടക്കൻ ഇംഗ്ലണ്ട് എന്നിവിടങ്ങളിലാണ് മഞ്ഞുവീഴ്ചയ്ക്കും ഐസിനും മഞ്ഞ (Yellow) മുന്നറിയിപ്പുകൾ നൽകിയിട്ടുള്ളത്. കൂടാതെ, വടക്കൻ ഇംഗ്ലണ്ടിലെ ചില പ്രദേശങ്ങളിൽ ആളുകളുടെ ആരോഗ്യത്തെ ബാധിക്കാൻ സാധ്യതയുള്ളതിനാൽ, യു.കെ. ഹെൽത്ത് സെക്യൂരിറ്റി ഏജൻസി (UKHSA) ആംബർ (Amber) അലർട്ടുകളും പ്രഖ്യാപിച്ചിട്ടുണ്ട്. വെള്ളിയാഴ്ച വരെ ഈ തണുപ്പ് തുടരും.
ചൊവ്വാഴ്ച സ്കോട്ട്ലൻഡിന്റെ മലമ്പ്രദേശങ്ങളിൽ 10 സെന്റീമീറ്റർ വരെ മഞ്ഞ് വീഴാൻ സാധ്യതയുണ്ട്. ചൊവ്വാഴ്ച രാത്രി മുതൽ വ്യാഴാഴ്ച രാത്രി വരെ വടക്കൻ സ്കോട്ട്ലൻഡിൽ കനത്ത മഞ്ഞുവീഴ്ച ഉണ്ടാകാം, ചില ഉയരം കൂടിയ സ്ഥലങ്ങളിൽ 20 സെന്റീമീറ്റർ വരെ മഞ്ഞ് പ്രതീക്ഷിക്കുന്നു. ബുധനാഴ്ച, മഞ്ഞുവീഴ്ചയോടൊപ്പം ഇടിമിന്നലുമുണ്ടാകുന്ന ‘തണ്ടർസ്നോ’ പ്രതിഭാസം വടക്കൻ സ്കോട്ട്ലൻഡ് ഉൾപ്പെടെ ചില പ്രദേശങ്ങളിൽ കണ്ടേക്കാം. വ്യാഴാഴ്ച രാത്രി താപനില മൈനസ് 12C വരെ താഴാൻ സാധ്യതയുള്ളതാണ് ഈ ആഴ്ചയിലെ ഏറ്റവും തണുപ്പുള്ള സമയം. എങ്കിലും, വാരാന്ത്യം ആകുമ്പോഴേക്കും തണുപ്പ് കുറഞ്ഞ് സാധാരണ നിലയിലേക്ക് മടങ്ങുമെന്നാണ് കാലാവസ്ഥാ പ്രവചനം.
Be the first to comment